Mi ta Nenga di Kere

Mi ta nenga di kere

k’e pais, isla ku mi ta stima

t’asina korumpí, k’e no tin salbashon

i ku, si tin strategia, esei ta resultado

di manipulashon di un grupitu

ku ta dominá gobernashon

Mi ta nenga di kere

ku pa servisionan sekreto

nos ta bala ku nan ta skòp pa skor gol

i ku nan wega ta pone, ken por gana

hopi plaka, ku droga òf ku arma

i ken mester horka òf manda prizòn

Mi ta nenga di kere

ku tin mandatario na benta

p’esnan ku ke kumpra nan desishon

i ku no ta pa bobedat nan ta kuminsá

proyektonan, ku sigur ta frakasá,

pero pasó tin intenshon kriminal

Mi ta keda nenga di kere

loke hopi ta pensa, kere òf bisa

ya ku mi no ke rindi dor di aseptá:

pero si ningun hende por splika

kiko t’e kontenido di nos bèrdat,

mi no por kulpa esun ku ta duda

sinseridat di esunan

ku supuestamente ta na altura