Historia Di Dependensia I Libertat

Mi ke kontabu den purá kon hende

a mete ku libertat i dependensia

den kurso di historia.

Musulman kasi mil aña

a dominá parti grandi di Spaña

pa pèrdè dominio despues.

Fransia a usa Britania tantu tempu

ku mayoría di palabra ingles

ta desendiente di lenga franses.

Hong Kong a bai bèk pa China

despues ku ingles a obligá chines

hür nan e isla un siglo promé.

Partinan di Hulanda a pasa di man

pa man di konkistadó i bandidu promé

k’a unifiká bira un solo reino.

Europeo k’a kere ku nan a yega India

a disidí ku e India nobo ta di nan

i a yama habitantenan djaya indjan.

Despues ingles nasé na Merka

a fada di hòrta pa Inglatera,

pa nan mes keda ku kos hòrtá.

A prohibí slavitut na Kòrsou

apénas shentisesenta aña pasá

despues di a permití esei pa siglonan;

te ainda nos no ta komprendé-

kiko outonomia i libertat

ta nifiká realmente.

Si nos opservá bon nos ta realisá

ku no tin fórmula ni strategia ideal

na kaminda pa libertat.

Sin poder òf forsa pa obligá, esun

ku ke ta liber mester spera di por konta

ku komprenshon i sosten di otro.